Nakemmeg dagiti sangapulo ket tallo nga tattao idiay Indonesia kalpasan a naglabsing ti agwarwaras a CCTV footage ti maipagarup a panagabuso kadagiti ubbing iti maysa a day-care center idiay Yogyakarta, Java Island.
Segun kadagiti otoridad, na-raid ti day-care a Little Aresha kalpasan ti damag manipud iti maysa a dati nga empleyado.
Makita iti agwarwaras a video dagiti ubbing nga awan pay ti dua ti tawenna, nakaidda iti suelo a nakasuot laeng ti diaper, idinto a dagiti dadduma ket nakagalot ti ima ken saka da babaen ti tela.
Pinasingkedan ni city police chief Eva Guna Pandia a dagiti nakemmeg ket buklen ti sangapulo ket maysa a child carers, headmaster, ken mangidadaulo ti foundation a mangpat-pataray ti day-care.
Mapilaan da ti kaso a child neglect ken manayonan pay bayat nga agtultuloy ti imbestigasion.
