Naiturn-overen ti motorsiklo iti akin-kukua kalpasan a naireport a napukaw idi June 27 idiay Langlangca 2nd, Candon City ken nasarakan idi June 28 idiay Caburao, Santiago, Ilocos Sur.
Ti motorsiklo ket kukua ti maysa a lalaki nga agnaed idiay Barangay Cadanglaan, Banayoyo.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, babaen ti affidavit ti akin-kukua ket nakaipalaon ti Admission of Negligence ken Waiver of Claims-na para iti pannakapukaw iti motorsiklo.
Segun ken ni Antalan, inamin ti akin-kukua nga adda nagkuranganna ken basolna iti pannakapukaw ti motorsiklo ta pinanawanna a nakatulbek.
Immunan nga imbingay ti akin-kukua nga idi June 27 ket mapapati nga adda nangsaruno kenkuana a nagkalugan iti motorsiklo bayat iti panagdalyasatna idiay Langlangca 2nd, Candon City ket mapapati a pinak-ulanda iti helmetna isu a nagbuteng ket in-inut a nagpaigid ken kellaatna lattan a pinanawan iti motorsiklona a nakaipan ti tulbek ket idi sinublianna ket awanen daytoy isu nga impakaammona kadagiti otoridad.
Ngem iti June 28 ket impakaammo dagiti kapulisan a nasarakan ti luganna idiay Barangay Caburao, Santiago a napanawan ken nakatulbek pay laeng.
Kinuna ni Antalan a mabalin a nagkamali laeng ti akin-kukua a nangbigbig iti lugar a nakaibatianna iti motorsiklo gapu iti butbutengna ta agasideg laeng dagiti nasao a barangay, ken posible a no adda iti nangala ket saanda nga intensyon nga itaray wenno ipanaw ta idi nasarakan ti motorsiklo ket nakaipan pay laeng iti tulbekna.
Kabayatanna, maibasar iti backtracking dagiti imbestigador kadagiti CCTV footage iti lugar ket awan iti nakitada a nangsurot iti akin-kukua iti nasao a motorsiklo.
