Balligi a naisalakan iti 120 nga Overseas Filipino a posible a biktima ti human trafficking ken dadduma pay a karaman iti krimen iti sabali a pagilian.
Babaen ti Inter-Agency Council Against Trafficking (IACAT), kadua dagiti ahensya ket napaawid dagiti Pilipino.
Segun kadagiti otoridad, pitopulo ket pito a tattao iti naisalakan manipod Laos, tallopulo ket pito idiay Myanmar, pakairamanan ti maysa a Pilipino a nakalibas ken lima manipod Cambodia.
Karaman kadagiti kaso ti maysa a babai a pinilit ti amona nga iparegreg ti sikogna tapno makatuloy nga agtrabaho, ken maysa pay a babai a mapapati a rinames ti Chinese team leader-na.
Kaaddoan kadagiti biktima ket maay-ayo kadagiti peke nga online job offers kangrunaan kadagiti kompania a karaman ti scamming ken cyber-fraud industry isu nga imbes a dakkel a sueldo iti maalada ket mapilitanda nga agtrabaho a maab-abuso.
Kabayatanna, agtultuloy iti repatriation efforts iti gobierno ket manamnama nga ad-adu a distressed Overseas Filipino iti sumangpet iti sumarsaruno nga aldaw.
