Maysa a water pump ti nauram iti kataltalonan idiay Barangay Manueva, ili ti Santa.
Iti pannakiuman ti Bombo Radyo Vigan ken ni Arsenio Corpuz, farmer’s president ti nadakamat a barangay ken isu ti akin-kukua ti water pump, naammuan na a nauram ti makina na a pagsibog kalpasan nga impakaammo kaniana ti maysa a kagawad a mannalon met laeng.
Saan a mamati ni Corpuz idi naipadamag kenkuana ti napasamak a pannaka-uram ti makina gapu ta namnamaen na daytoy a pagsibog iti mula-na.
Segun ken ni Corpuz, mapapati a nauram ti makina idi rabii wenno itay parbangon gapu ta natalged pay laeng a pinanawan na idi kalman.
Kabayatanna, masdaaw ni Barangay Captain Manuel Bahet, maysa met laeng a mannalon gapu ta ita laeng a mapasamak ti daytoy nga insidente iti mano a tawen ti napalabas.
Kadawyan pay ket nga ibati da dagiti makina da iti kataltalonan kalpasan ti panagsibog kadagiti mula da ket manipud idi agingga ita ket tatta laeng a mapasamak iti insidente.
