Nangipilan iti counter affidavit-na iti Office of the Ombudsman ni Vice President Sara Duterte kas sungbat iti reklamo nga impila ti House of Representatives kontra kenkuana iti mapapati a saan a husto a panagaramatna iti confidential funds.
Ala una iti malem ti Biernes, napan dagiti abogado ni VP Duterte, kadua ni dati nga Usec Atty. Michael Poa, idiay Ombudsman.
Naikkan iti sangapulo nga aldaw ni VP Sara ken dagiti sumagmamano a kameng ti Department of Education ken Office of the Vice Presidente tapno agpalawag kadagiti reklamo nga impila ti kamara kas ti plunder, technical malversation, falsification, use of falsified documents, perjury, bribery, corruption of public officers, ken dadduma pay.
No saan a masungbatan dagiti akusado, kinuna ti Ombudsman a desisyonanda daytoy maibasar iti ebidensya nga impila ti nangakusar.
