Plano a paayaban ti House Prosecution panel nga ipa-subpoena ni Vice President Sara Duterte tapno obligaren a tumestigo iti presentasion ti ebidensia iti impeachment article mainaig ti grave threats allegations, segun ken ni counsel for the prosecutors Atty. Lorna Kapunan.
Pinasingkedan ti abogado a gagem ti prosekusyon a mangipila ti request para iti subpoena iti uneg ti sangapulo ket maysa a trial days a nakailatang para iti presentasion ti ebidensia para iti Article IV.
Segun ken ni Atty. Kapunan, ti nadakamat a request ket maipila inton Martes, Hulyo 14 kas panangsurot iti procedures ti korte ken mapasurotan daytoy ti legal memoranda manipud iti depensa ken prosekusyon.
Impaganetget met ni Trial Presiding officer Francis Escudero iti prosekusyon a pag-desisyonan da ti request iti oras a pormal a maipila ti request ti panel ti written motion.
