Posible a mayatiddug agingga iti sumaruno a tawen ti voter registration para iti Barangay and Sangguniang Kabataan Elections.
Dayta ti pinasingkedan ni Commission on Elections Chairman George Erwin Garcia kagiddan ti panangrugi iti sangapulo nga aldaw a panagparehistro dagiti agbotos iti BSKE.
Segun ken ni Garcia, mabalin a mayatiddug ti voter registration ket agtultuloy agingga 2026 nga isu ti panagbalinton a linteg ti BSKE postponement.
Iti agdama, yur-uray pay laeng ti poll body a permaan ni Presidente Ferdinand Marcos Jr. ti bicameral conference committee report mainaig iti nasao a banag.
Agtultuloy met ti panagsagana ti COMELEC para iti BSKE inton Disyembre ta posible nga adda dagiti mangipila iti Temporary Restraining Order iti Korte Suprema a ti gagemna ket isardeng ti pannakaisanud ti eleksion.
