VIGAN CITY – Manamnama ti pannakaited ti pammadayaw ken insentibo ti San Juan Local Government Unit kadagiti uppat a mangngalap a nakaalaw iti duapulo ket uppat a pakete ti shabu nga aggatad iti PHP163.2M iti kabaybayan, sangapulo ket innem a nautical miles ti kaadayona manipud iti bangkag idiay Barangay Solotsolot, San Juan.
Iti pannaki-uman ti Bombo Radyo Vigan ken ni Barangay Captain Eliseo Javier, pagyamananna dagiti nasao a mangngalap ta napanunotanda iti mangiturn-over kadagiti maseknan tapno saan a maaramat a pakadadaelan ti biag dagiti umili.
Kiddawna kadagiti dadduma pay a mapmapan iti taaw a no adda maal-alawda a kasta ket ipaimada kadagiti pannakabagi ti linteg.
Kabayatanna, pinasingkedan met ti mangngalap a nakakita iti langgusti a ni Christopher Villaspir nga idi damo ket impagarupda a dolyar ti linaonna isu a naklaatda idi mapaneknekan a daytoy ket shabu.
Segun ken ni Villaspir, impaalana nga umuna iti kaduana ti langgusti ngem naibbatanna gapu iti kadagsenna isu a sinublida ket idi linukatanda, naalsem ti naangotda ken nakitada ti chinese markings-na.
Napagdesisyonanda met nga itugot iti barangayda ket intawagda ken ni Kapitan nga isu met ti nangayab kadagiti pannakabagi ti linteg a nangkumpirmar a dagitoy a naalawda ket iligal a droga.
