Natalgeden ti kasasaad ti driver ti motorsiklo ken ti nadungparna a lalaki kalpasan ti aksidente iti national highway idiay Barangay Maynganay Norte, Sta. Maria, Ilocos Sur idi alas otso kuarenta iti rabii idi April 10, 2025.
Ti nagmaneho iti Rusi Macho a motorsiklo ket ni Junwil Balingoay Del Rosario, agtawen iti duapulo ket lima, taga-Barangay Banoen, Quirino idinto a ti pedestrian ket ni Elmor Tamayo Limon, agtawen iti uppat a pulo ket walo, taga-Barangay Maynganay Norte, Sta. Maria.
Iti pannaki-uman ti Bombo Radyo Vigan ken ni PMaj. Macario Dulawan Jr. manipod Sta. Maria Municipal Police Station, agpapaimbag dagiti dua iti ospital iti 1st district iti probinsia kalpasan iti pannakadundunorda gapu iti aksidente.
Naammoan nga agpada a naka-inom dagiti dua idi napasamak iti aksidente ngem ti nakamotorsiklo iti mapapati nga adda nagkuranganna.
Maipalagip nga agpapabagatan ti motorsiklo idin ta nadungparna ti pedestrian nga adda iti laud a paset iti kalsada iti nasao a lugar.
VIDEO – PMAJ. MACARIO DULAWAN JR.
