Naduktalan a naka-inom iti arak ti lalaki a nalmes idi April 27 iti Chico River idiay Sitio Cayapa, Barangay Poblacion, Suyo, Ilocos Sur.
Ti natay ket ni Ariel Pira, agtawen iti limapulo ket dua, construction worker nga agnaed idiay Barangay Cabugao, Suyo.
Ti pannaki-uman ti Bombo Radyo Vigan ken ni PCpt. Godofredo Ribuyaco manipod Suyo Municipal Police Station, napan nagpicnic ti biktima kaduana ti pamiliana idin napan nagdigos iti karayan a maymaysana bayat a naka-inom iti arak ket kalpasan laeng iti sumagmamano a minutos ket saanen a nakita pay ti putotna.
Segun ken ni Ribuyaco, nagpaarayat ti putot ti biktima isu a naalaw ti bagi ti biktima ket naipan iti Tagudin District Hospital ngem naideklarar a dead on arrival.
Nalaing nga aglangoy ken agbatbatok pay ti biktima ngem patien dagiti otoridad a gapu iti kinabartekna ket isun ti pannakalmesna.
Saanen a maidalan ti autopsy iti bangkay ti biktima ta patien ti kameng ti pamiliana nga awan ti foul play ti pannakatay ti biktima.
Nagpalagip ni Ribuyaco kadagiti agindeg iti Suyo a nu mapanda agpipicnic ket agannad iti panagdigos iti karayan ken nasaysayaat nga ipakaammoda kadagiti otoridad tapno makapag-standby da nu kas bilang adda iti emergency.
VIDEO – PCPT. GODOFREDO RIBUYACO
