Imon ti mapapati a rason ti nangpaltugan ti maysa a lalaki iti mapapati a karelasyonna a person with disability idiay Sitio Pitao, Barangay Bagalay, Tayum, Abra.
Ti biktima ket ni Florida Alcaide Teneza, agtawen iti tallopulo ket siam, taga-Bagalay, Tayum, Abra.
Ti met suspek ket ni Bobby Briosos alyas “Bob”, tumaray a para Municipal Councilor ti Dolores, Abra iti salinong ti Asenso Party para iti National and Local Elections inton 2025 ken agnaed iti Barangay Mudiit, Dolores, Abra.
Alas dyes y media iti rabii iti October 27, nakaawat ti tawag ti MTOC ti Tayum Municipal Police Station manipud iti Barangay Tanod ti Bagalay a ni Isidro Taeza a nangipakaammo nga adda napasamak a pammaltog iti nasao a lugar.
Iti pannaki-uman ti Bombo Radyo Vigan ken ni PCapt. Michael Joe Dasalla, adda iti uneg ti pagtaenganna ti biktima a kadua ti anakna nga umel met laeng idi pinaltugan ti suspek babaen iti caliber 45 a paltog a puon ti nakatayanna.
Ti anak ti biktima ti nangbigbig iti suspek babaen iti panangipakita dagiti pannakabagi ti linteg kenkuana iti ladawan ket intudona nga isu ti pimmatay iti inana.
Dagus a naglibas ti suspek kalpasan ti pammaltog idinto a ti Tayum MPS ket nangisayangkat iti manhunt operation ket nakemmeg ti suspek iti pagtaenganna.
Innayon ni Dasalla nga ibagbaga ti biktima kadagiti kabagyanna nga adda relasyonda iti suspek ngem paglibakan met ti suspek.
Ti suspek ket dati a gwardya iti maysa a cell site nga asideg iti pagtaengan ti biktima ket kanayon idi a mapmapanna tultulongan.
