Kaso a frustrated homicide ti sangwen a kaso ti lalaki a nangbagkong ti kinainumanna idiay Barangay Rosario, Cervantes, Ilocos Sur.
Ti suspek ket lalaki nga agnaed idiay Barangay Tablak, Mankayan, Benguet idinto a ti biktima ket maysa a lalaki nga agtawen iti duapulo ket maysa, agnaed iti Comillas North, Cervantes.
Iti pannaki-uman ti Bombo Radyo Vigan ken ni PCpt. Oliver Sari nga ACOP iti Cervantes Municipal Police Station, nasayaaten ti kasasaad ti biktima ngem agtaltalinaed pay laeng iti ospital para iti panagpalaingna gapu iti dunor iti ulo a sinagabana.
Segun ken ni Sari, agam-ammo ti biktima ken suspek ken awan iti dati a susikda iti tunggal maysa ngem iti panaginomda ket adda iti saanda a nagkinnaawatan gapu iti kinabartekda a posible a rason iti pammagkong.
No pay kasta ket awan met iti rekord ti suspek iti kapulisan maipanggep iti kas met laeng iti nasao a pasamak ta saan nga agindeg isuna iti probinsia.
Kabayatanna, ti pannakakemmeg ti suspek ket naala kenkuana iti naaramat a bladed weapon nga iti agdama ket addan iti kustodiya dagiti pannakabagi ti linteg.
