Na-fracture iti akin-kannawan a takyag ti driver motorsiklo ken nadunor met ti backride-na kalpasan a nakadinnungparna iti maysa a pick-up iti national highway idiay Barangay Dan-ar, Santiago, Ilocos Sur idi kalman, August 25, 2026.
Ti nagmaneho iti Yamaha Sniper 155 ket lalaki nga agtawen iti tallopulo ket lima, addaan ti non-professional driver’s license nga agnaed idiay Barangay Comillas South, Cervantes; ken ti backride-na a maysa met laeng a lalaki.
Ti met nagmaneho iti Toyota Hilux ket lalaki nga agtawen iti duapulo ket lima, addaan ti non-professional driver’s license nga agnaed idiay 145 SLU-SVP Bakakeng Old Site Ext, Baguio City.
Sakbay iti aksidente, agpada nga agpapaamianan dagiti dua a lugan a ti akin-sango ket ti nakamotorsiklo.
Idi nadanonda iti nasao a lugar, nag-ovetake ti pickup iti motorsiklo iti shoulder lane ngem bayat iti proseso ket pinanggep ti nakamotorsiklo nga inovertake-an ti lugan nga adda iti sangwananna iti met laeng shoulder lane isu a naidungpar iti pickup.
Gapu dayta ket na-fracture ti akin-kannawan a takyag ti driver ti motorsiklo idinto a nadundunor iti agduduma a paset ti bagi ti backride isu a naipaagasa iti Candon General Hospital para iti pannakatamingda idinto a saan a naan-ano ti driver ti pickup.
