Dead on arrival ti maysa nga ubing a nadungpar iti pickup truck iti national highway ti Barangay Uso, Suyo, Ilocos Sur.
Ti ubing ket agtawen iti pito, agnaed iti nasao a lugar.
Ti met Toyota Hilux ket minaneho ti maysa a lalaki nga agtawen iti tallopulo ket tallo, agnaed iti Itogon, Benguet.
Agpapalaud ti pickup truck idinto a ti ubing ken ti inana ket nakaluganda iti traysikel.
Dimsaag ti ina manipud iti traysikel tapno ibaba dagiti kargada ket saanna a nadlaw ti anakna a timmaray ken bimmallasiw iti kalsada a puon ti pannakadungparna.
Natulid iti kalsada ti ubing ket nadunor ti nadumaduma a paset ti bagina ngem saanen a naispal pay ti biagna idi maipaagas iti ospital.
Saan met a naan-ano ti drayber ti pickup truck nga adda itan iti kustodia ti Suyo Police Station tapno dumalan iti husto a proseso.
