Nadunor iti ulo ken nagasgasan iti agduduma a paset ti bagi ti maysa nga ubing a lalaki ta nadungpar iti Multi-Purpose Vehicle (MPV) iti national highway idiay Barangay Bungro, Magsingal, Ilocos Sur.
Ti pedestrian ket agtawen iti sangapulo ket dua, Grade 6 pupil nga agnaed idiay Magsingal.
Ti met nagmaneho iti Toyota Innova ket ni Dexter De Guzman Reyes, agtawen iti tallopulo ket walo, naasawaan, holder iti Professional Driver’s License nga agnaed idiay Bagong Silang North, Muntinlupa City.
Nakaawat ti Magsingal Municipal Police Station ti tawag manipod iti concerned citizen a nangipakaammo iti napasamak nga aksidente iti nasao a lugar isu a nagresponde dagiti otoridad ket idi nakadanonda, naammoan a dagiti karaman iti aksidente ket naipan iti Ilocos Sur District Hospital – Magsingal.
Idi agballasiw ti ubing manipod laud nga agpadaya a direksyon ket aksidente a nadungpar iti MPV nga agpapabagatan a direksyon.
Gapu iti dunor iti ulo ken nadumaduma a paset ti bagi ti ubing ket naipan iti ospital idinto a saan a naan-ano ti nagmaneho ti MPV.
