Natay ti maysa a tricycle driver kalpasan a binagkong iti namin-ano a daras ti padana met laeng a tricycle driver iti V. Delos Reyes Street, Vigan City, Ilocos Sur itay alas nuebe y media iti bigat, March 8, 2026.
Ti biktima ket lalaki nga agtawen iti uppat a pulo ket siam, naasawaan nga agnaed idiay Barangay IV, Vigan City.
Ti met suspek ket agtawen iti limapulo ket tallo, naasawaan, tricycle driver nga agnaed idiay Barangay Manueva, Santa.
Nakaawat ti pakaammo ti Vigan City Police Station maipanggep iti napasamak a pammagkong iti nasao a lugar a nakairamanan dagiti dua isu a nagrespondeda.
Segun kadagiti nakakita iti pasamak, adda saan a nagkinnaawatan ken naririan dagiti dua a gappuanan iti panagkinnabilda, idin kellaat a nangiruar ti suspek ti kutsilyo ken isu iti imbagsolna iti namin-ano a daras iti biktima.
Nagsagaba iti adu a dunor ti biktima iti agduduma a paset ti bagina isu a naipan iti Ilocos Sur Provincial Hospital Gabriela Silang ngem natay bayat iti pannakatamingna idinto a ti suspek ket naglibas kalpasan iti pammagkong pakairamanan ti kutsilyo nga inaramatna.
Nangisayangkaten dagiti otoridad iti hot pursuit operation tapno masarakan ti suspek.
