Saan nga impagarup ti Team Yogi Mafia nga isuda iti champion iti Prelude Dance Competition 2024 a naisayangkat idiay Baguio City.
Iti pannaki-uman ti Bombo Radyo Vigan ken ni Emanuel a maysa kadagiti miembro iti Yogi Mafia, impaayda amin a kabaelanda ken sakripisyo para iti panag-practice tapno maperpekto iti stepda.
Karit kadakuada iti oras iti panag-practice ta masansan a rabii iti papanda gapu iti agduduma nga schedule-da ta adda dagiti agtrabtrabaho, agad-adal ken adda met dagiti adda bukoddan a pamilia.
Aminadoda a narigat ti time management ngem ipakpakaawatda kadagiti kameng ti pamiliada iti panagpractice da ta hiligda a talaga iti agsala ket kinalikagumanda iti agperform iti national level a banag a nagun-odda.
Saan a nalaka iti isasalida iti national competition ta registration pay laeng ket addan iti bayadna isu a pagyamananda ni dati nga Ilocos Sur Governor Luis Chavit Singson iti panangipaayna iti pagrehistroda ken uray ti City Government of Vigan babaen ti panangidaulo ni Mayor Bonito Singson para iti transportasyon a nagturong idiay Baguio City ken yamanenna pay amin a timmulong a nangted iti para iti costume ken nadumaduma pay a suportar para iti pannaki-contest-da.
Narigat iti kompetisyon ta aminadoda a nalaing amin a kalabanda ket ti napigsa a kinalabanda ket ti grupo iti Baguio City ta sabsabali iti impakitada a performance-da.
Nupay kasta, babaen ti dedikasyon ken panangipakita iti talento iti Team Yogi Mafia ket nag-championda.
Kabayatanna, manamnama a ti nasao a grupo iti mangibagi iti Pilipinas iti contest idiay Amerika inton November 16, 2024.
