Pinaglibakan ti abogado ni dati a Congressman Zaldy Co nga agtagikua ken agtaltalinaed iti agdama ti dati nga agpampanday linteg iti nangina a pagtaengan idiay Paris, France.
Kasaruno dayta iti sarita ni Interior Secretary Jonvic Remulla a mapapati nga adda pagtaengan ni Co iti Champs-Elysees nga adda sangapulo a kuartona ken aggatad iti nasurok-kumurang 200 million dollars wenno euros.
Kinarit ni Atty. Ruy Rondain nga abogado ni Co ni Remulla no masapulanna ti maibagbaga a sanikua ti agpampanday linteg ket mabalinan a maala karaman iti mapapati a P5 billion cryptocurrency a maibagbaga a kukua ni Co.
Maipalagip a sumangsango ni Co kadagiti kaso a graft and malversation maipanggep iti maanomalya a P289.5 million flood control project idiay Oriental Mindoro.
Idi Abril ket na-detain ni Co idiay Czech Republic kalpasan a mapapati a pinanggepna a sumrek idiay Germany babaen ti expired passport no man pay nawaya-wayaan met laeng ken saanen a naabotan dagiti otoridad iti Pilipinas.
Kinuna met ti Malakanyang a mapapati a nagipila ni Co iti asylum idiay France.
