Pinalag-an ti Social Security System (SSS) dagiti requirements para iti pannaka-avail iti emergency loan kagiddan ti krisis a mapaspasaran.
Iti pannaki-uman ti Bombo Radyo Vigan ken ni Christian Andrew Rillorta a Regional Communication Officer iti SSS Luzon North 1 Division, addaan iti tallo a relief programs iti SSS iti panawen ti krisis nga isu ti emergency loan, increase pension ken contribution penalty condonation program a para kadagiti miembroda.
Segun ken ni Rillorta, ti emergency loan ket mabalin a ma-avail dagiti miembro a nakatinnagen iti sangapulo ket walo a bulan, a ti dati ket tallopulo ket innem a bulan a nakatinnag iti kontribusyonna.
Kinunana addaanda pay iti innem a bulan a moratorium a ti kayatna a sawen ket sada laeng agsingir kalpasan iti innem a bulan.
Sakup ti nasao a programa dagiti miembro nga adda iti pagilian wenno kadagiti overseas Filipino workers.
Pinasingkedan ni Rillorta nga online application met laeng iti maaramid a kas iti ububraen iti salary loan babaen laeng iti panag-login iti my.SSS portal ket saanen a kasapulan pay iti mapan iti opisina iti SSS.
