Inallukoy ni Presidente Ferdinand Marcos Jr. dagiti Pilipino kangrunaan kadagiti adda iti impormal a sektor ken dagiti self-employed a regular nga agitinnag iti Social Security System ken Pag-IBIG Fund tapno masigurado ti seguridad iti masangoanan.
Pinasingkedan ni presidente Marcos nga umabot iti 44 milyon a Pilipino ti sakop iti SSS, pakairamanan daytoy dagiti driver, vendor, gig workers, dagiti job order ken contract of service workers.
Segun iti presidente, gagem ti gobierno nga ad-adu pay a mangmangged, kangrunaan kadagiti adda iti impormal a sektor ti agbalin a miembro ti SSS.
Pinasingkedan ni Marcos a napateg ti SSS, Pag-IBIG Fund, ken GSIS gapu ta mangit-ited dagituy ti tulong pinansyal iti panawen ti emergency, kalamidad ken dadduma pay a krisis.
