Imbilin ni Presidente Ferdinand Marcos Jr. kadagiti sangapulo a baro a nagsapata nga opisial ti gobierno nga unaen ti programa ken addang a makatulong iti panagbaba ti presio dagiti kangrunaan a magatang ken panangpalag-an ti selebrasion ti Paskua para kadagiti pamilia a Pilipino.
Pinasingkedan ni Presidential Communications Office Secretary Lino Cayetano a karaman iti priyoridad ti presidente ti panangpatalinaed ti nalaka a presio dagiti magatang, panangpasayaat ti serbisio iti transportasion ken panangpasigurado a maawat dagiti mangmangged ti sweldo ken benepisio da ita a Paskua.
Segun met kenni Executive Secretary Ralph Recto, kayat ni presidente Marcos a selebraran dagiti pamilia a Pilipino ti Paskua a saan a marigatan iti nangato a presio dagiti magatang ken inaldaw a gastos.
Iti met sektor ti transportasion, impaganetget ni Department of Transportation (DOTr) Secretary Vince Dizon a kayat ni Marcos a makissayan ti oras dagiti commuter iti panag-biahe ken makatipid iti plete, kangrunaan iti manamnama a panagadu ti pasahero ita a Paskua.
