VIGAN CITY – Nadunor ni John Rey Fabilinia nga agtawen ti sangapulo ket siyam, baro ken agnaed idiay Margaay, Narvacan iti panagtitinnukbob iti tallo a lugan, pakairamanan iti nagluganan na a motorsiklo idi alas- 10:45 am ti September 8 idiay Barangay Margaay.
Malaksid iti motorsiklo a nagluganan ni Fabilinia, dagiti nagtitinnukbob a lugan ket ti 18- wheeler wing van a minaneho ni Randy Estorco nga agtawen ti uppat a pulo ket innem, naasawaan ken agnaed idiay Caoige, Tuba, La Union ken ti asul a Mitsubishi Mirage a minaneho ni Richard Harris Barbero nga agtawen ti uppat a pulo ket maysa, naasawaan ken agnaed idiay Sta. Maria, Calauag, Quezon.
Maibasar iti inisyal nga imbestigasyon, agpapa-abagatan amin dagiti nasao a lugan idi aksidente a naidungpar iti poon iti acacia iti wing van a minaneho ni Estorco.
Agsipud iti dayta, bigla a nagsardeng iti sumar-saruno kenkuana na a ni Barbero a nagmaneho ti Mirage ket posible a saan a napasimadan ni Fabilinia iti panagsardeng ni Barbero isu a natukbob na iti likudan a paset ti kotse na a poon iti nakadunuran na.
