VIGAN CITY- Naduma-duma a klase ti infection ti kudil iti mabalin a sagabaen dagiti tattao itatta a nabara iti panawen wennu ti aw-awagan da ti summer season.
Segun ken ni Dr. Divina Vera Cruz- Basilio, maysa a dermatologist, adda ti tallo a klase ti infection a masansan a sagabaen dagiti tattao nu nabara iti panawen kas ti bacterial infection kas ti lupluptak ken kamuro wennu pimples ta aglanit iti rupa gapu ti pudot nga isu ti rason nu apay nga aglukat dagiti pores iti rupa; fungal infection iti kili-kili ken singit gapu ti ling-et ken viral infection kas ti kamuras ken tuko.
Ti lupluptak ket gagangay a sagabaen dagiti ubbing a masansan nga agay-ayam iti daga ken ti karootan isu a napinpintas nu anawaen dagiti ubbing nga agay-ayam iti daga, surwan ida iti proper hygiene, pakanen ida ti balanced diet ken painumen ida ti adu a danum.
Kabayatanna, tapnu met maliklikan ti agkamuro, masapul a liklikan dagiti ubbing ken agtutubo ti agpuyat ken ma-stress gapu ti gadgets nga isu pay iti saan da a pakaturturugan.
Malaksid kadagiti nasao a klase ti infection, ti kagat dagiti insekto ken gaddil pay iti gagangay a sakit a mabalin a mapasaran dagiti tattao ta nu napudot ket agraira dagiti naduma-duma nga insekto.
Inballaag ni Dr. Basilio a mabalin nga agtinnag iti kidney disease nu kanayon nga aggaddil ti ubing isu a masapul a sursurwan ida ti proper hygiene ken ugalien iti kanayon a panagdalus iti aglawlaw.
