Dakkel a dayaw para ken ni Graziella Sophia Ato a taga-Raois, Vigan City, Ilocos Sur iti panangibagina iti pagilian para iti 33rd Southeast Asian Games a maisayangkat idiay Thailand inton Disyembre.
Dayta ket kalpasan a nag-1st place ni Ato iti 10 km Open Water Swimming Championships iti Philippine Aquatics, Inc. National Tryout isu a kualipikado para iti 2025 Sea Games.
Iti pannaki-uman ti Bombo Radyo Vigan ken ni Ato, inaminna nga iti baet a nakasalin idi kallabes iti international competition ket saanna a maliklikan iti agdanag gapu iti pressure ken isuna iti kaubingan a simmali.
Segun ken ni Ato, sagsaganaanna iti nasao a kompetisyon ta manon a tawenda nga agsansanay kaduana ti coach-na ta arapaapna a makadanon iti nasao a lebel.
Manipod 7 years old ni Ato ket nakasursuron nga aglangoy iti swimming pool ken adda metten dagiti nakisalipanna ngem idi napan a tawen ket impadasna iti nakisali iti Open Water a gappuanan ti pannaka-qualified-na iti maysa a contest idiay Hong Kong, agingga intultuloyna ken impadasna iti tryout para iti sea games.
Imbingayna nga awan iti parikot uray agiddan ti panagadalna ken aktibidadna iti swimming ta siguradoenna a nasayaat iti panangmaneharna iti oras.
