Nayatiddog ti suspension iti klase ti amin a lebel iti pampubliko ken pribado a pagadalan ken uray trabaho iti public offices iti Ilocos Sur inton bigat, November 8, 2024 gapu ti Bagyo Marce kas maibasar iti Executive Order No. 32, Series of 2024 a pinirmaan ni Governor Jeremias Jerry Singson.
Nabilin amin a local government units a dumalan ti critical preparedness actions ken response protocols gapu iti manamnama nga epekto ti Bagyo Marce a kas iti panangisayangkat ti mandatory preemptive evacuations kangrunaan kadagiti low-lying areas, ken panangliklik kadagiti lugar a masansan a malayos ken ma-landslide.
Amin a departamento ken ahensya a nakaraman ti panangipaay ti basic ken health services, calamity response ken preparedness measures wenno ti panagakem iti dadduma pay a vital public services ket maituloy ti panag-operate-da.
Kadagiti pribado a business establishment ken offices ket nakadepende iti employers-da iti suspension ti trabahoda.
