Nangiruar ti baro nga alegasion ti sumagmamano a dati a bodyguard ni dati nga Ako Bicol Party-list Representative Zaldy Co kalpasan nga innaganan da dagiti sumagmamano nga opisial ti gobierno ken personalidad iti media a maipagarup a nakaawat ti kuwarta manipud iti dati nga agpampanday linteg.
Inyam-ammo ti abogado ti grupo a ni Atty. Levito Baligod dagiti uppat a baro a testigo.
Maysa kadakuada ti nangibaga a karaman isuna iti panangipatulod ti maleta para ken ni dati nga House Speaker Martin Romualdez, ken Senator Erwin Tulfo.
Inraman pay ti nagpayyam-ammo a bag-men ni Co ni Commission on Elections (COMELEC) Chairperson George Garcia a maipagarup nga immawat ti kuwarta.
Adda pay maysa a dati nga aide ti nangibaga a maipagarup a nangipatulod ti uppat a maleta nga adda karga na a kwarta iti balay ni Senador Francis Escudero.
Maipagarup pay nga immawat ti kuwarta ni Senador Kiko Pangilinan ken Sharon Cuneta, banag a pinaglibakan da.
