Nangipilan iti counter affidavit iti sumagmamano nga akusado iti lima a kaso nga adda pakainaigan ti maanomalya a flood control projects idiay Bulacan.
Ngem segun ti Department of Justice (DOJ), adda ti sumagmamano a karaman iti nagkiddaw ti palugit wenno extension tapno mangted iti saritada.
Segun ken ni DOJ Spokesperson Atty. Polo Martinez, naikkanda iti agingga Biernes tapno agipasa ket no mapaayda, matuloy iti panagdenggeg ken madesisyonan iti kaso kas maibasar kadagiti nakalap nga ebidensya.
Karaman kadagiti dimmar-ay iti maikadua a preliminary investigation dagiti dati nga engineer iti Department of Public Works and Highways (DPWH) a da Henry Alcantara, Brice Hernandez ken Jaypee Mendoza.
Saan met a dimmar-ay iti PI ti contractor a nairaman a ni Sally Santos iti Syms Construction ngem nagipiladan iti kontra a saritada.
Kabayatanna, nagpawagan ti Justice Department kadagiti indibidual nga impakemmeg ti Sandiganbayan a sumukon idinto a nagkedked a mangted iti impormasyon ni Martinez nu ammona iti ayan ni dati nga Ako Bicol Partylist Rep. Zaldy Co.
