VIGAN CITY – Dead on arrival ti maysa a lalaki a napaltugan idiay Barangay San Vicente, Magsingal, Ilocos Sur.
Nabigbig ti biktima a ni Mario Jose Corpuz Ronquillo alyas Botchoy, stencil aide ken aggigyan idiay San Vicente, Magsingal.
Imanmaneho ti biktima ti traysikelna iti barangay road ti nasao a lugar idin ta adda dua a saan pay nabigbig a lallaki a nakalugan iti motorsiklo ti nangsurot kenkuana a nangpaltog iti namin-ano a daras sa da naglibas a nagpadaya.
Gapu dayta, insigida met a dimsaag ti kadua ti biktima iti traysikel a nagpalaud a direksyon.
Uppat a tama ti paltog ti sinagrap ti biktima a naitaray iti Ilocos Sur District Hospital Magsingal ngem saanen a nakalasat.
Narekobre manipud iti nakapasamakan ti krimen ti uppat a fired cartridge, cellphone ken traysikel.
