Impakaammo ni Interior Secretary Jonvic Remulla a napagkedkedan ti asylum application ni dati a presidential spokesperson Harry Roque, nga adda idiay Austria gapu ti maipagarup a pannakaidadanes iti politika.
Nupay kasta, pinaglibakan ni Roque ti kinuna ni Remulla ket inpapilitna nga ur-urayen pay laeng ti opisial a decision dagiti otoridad ti Austria, bayat nga inawaganna ti report kas fake news.
Impakdaar ni Remulla nga ipaarestona ni Roque no mangipaulog ti Interpol ti red notice kontra kenkuana, mainaig iti arrest order iti qualified human trafficking case.
Impasingked ti Malakanyang nga awan ti nakaibatayanna ti panagkuna ni Roque a ti political persecution ti rason ti asylum bid-na, idinto a kinuna ni Remulla nga ipamaysana met ti asylum bid idiay France ni dati a Rep. Elizaldy “Zaldy” Co.
