Simmango dagiti naimbitaran a retirado a mahistrado ti Korte Suprema iti Senate impeachment court tapno mangted ti personal ken legal nga ammo ken kapadasan mainaig iti interpretasion ti probision ti 1987 Constitution a kasapulan ti 2/3 vote for all the members of the Senate para iti conviction.
Pinasingkedan ni retired Supreme Court Chief Justice Hilario Davide Jr. a ti basaran iti panag-kuwenta ti 2/3 vote iti impeachment trial ket masapul dagiti bilang dagiti senador a kwalipikado nga agbotos, saan nga otomatiko nga amin a 24 a miembro ti Senado.
Para met ken ni retired Supreme Court Chief Justice Artemio Panganiban, masapul nga agbotos dagiti senator-judge basar iti husto ken patas.
Pinasingkedan ni dati a Supreme Court Associate Justice Adolfo Azcuna a mabalin latta nga agbotos ti maysa a senator-judge uray saan a nakadar-ay iti panagdengngeg ti impeachment trial.
Segun ni Azcuna, no mamati ti maysa a senador a kabaelan na nga ited ti patas ken husto a decision basar iti buo a rekord ti kaso ken kas panangsurot iti Constitution ken linteg ket mabalin latta agbotos iti impeachment proceedings.
Kabayatanna, para met ken ni retired Supreme Court Associate Justice Reynato Puno a ti bilang ti botos para iti impeachment conviction ket maibasar iti “two-thirds of all the Members of the Senate.”
Segun kenkuana, gapu ta fraction ti naaramat iti Constitution, mabalin nga agbaliw ti kasapulan a bilang ti botos depende iti kabuklan a bilang dagiti miembro ti Senado.
