VIGAN CITY – Temporaryo nga agtugaw kas mayor ti Bangued, Abra ni Senior Sangguniang Bayan Member Joaquin Enrico Valera Bernos ta dagiti apong na a da incumbent Mayor Dominic Valera kenni Vice Mayor Mila Valera ket temporaryo a pinasardeng iti trabaho ti Office of the Ombudsman gapu ti sangsangwen da a kaso.
Napaneknekan a guilty iti kaso a grave misconduct ken conduct prejudicial to the best interest of service ni Mayor Dominic gapu iti mapapati a panangpadaras na kadagiti transaksyon iti local a gobiyerno kadagiti kompanya a kukua iti pamilya da kas ti Abra Petron ken DMJS Tarpaulin Printing Shop.
Nairaman ni Vice Mayor Mila ta isuna ket asawa ti mayor ken napaneknekan iti koneksyon na kadagiti nasao a transaksyon.
Nakailanad pay iti bilin ti Ombudsman a nadadael iti imahe ken integridad iti opisina ti mayor gapu kadagiti inaramid na ken inpakita na iti panangabuso na iti naikawes kenkuana a karbengan nga agserbi kadagiti tattao.
