Idurduron ni Senate President Vicente Sotto III ti gakat a Senate Bill No. 1835 wenno An Act Reorganizing the Department of Public Works and Highways (DPWH) and Rationalizing the Powers and Functions of the Central, Regional, and District Offices, tapno papigsaen ti transparency, efficiency ken accountability kadagiti public infrastructure governance.
Pinasingkedan ni Sotto a resulta ti gakat ti sumagmamano a serye ti imbestigasion iti flood control projects isu a nakaswan dagiti sumagmamano a personalidad pakairaman ti senador, kongresista ken pribado nga indibidwal.
Impakaammo ti opisial nga agserserbi ti public infrastructure iti panagdur-as ti pagilian gapu ta makaaramid ti trabaho ken masolbar dagiti kangrunaan a kasapulan.
Nakaituding iti gakat ti panang-reorganize iti Department Proper kas panangsurot iti kangrunaan nga infrastructure project iti salinong na tapno maaddaan ti decentralization ti preparasion ken implementasion ti proyekto ken maikkatan ti oportunidad para iti iregularidad ken pannakaitantan.
