Kwinestionaran dagiti estudyante ti Pamantasan ng Lungsod ng Maynila wenno PLM ti decision ti Board of Regents nga ikkan ti honorary Doctor of Laws degree ni President Ferdinand Marcos Jr.
Iti joint statement ti PLM Supreme Student Council, ken 33 a dadduma pay nga student councils and organizations, pinasingkedan da a saan da a nakonsulta iti nadakamat a pammadayaw ken mabalin a panangiyendorso daytoy iti administrasion ni Marcos a maipagarup nga agtultuloy a sumangsango kadagiti isyu iti transparency, accountability ken human rights.
Impaganetget dagiti estudyante a masapul a nangatngato ti pagibasaran iti panangted ti honorary degree ngem iti posision ti maysa a personalidad.
Ni president Marcos ket napadayawan ti honorary Doctor of Laws degree ti PLM idi Agosto 27 kas pammigbig iti suporta na kadagiti proyekto ti pagadalan, pakairamanan ti konstruksion ti PLM Medicine and Allied Sciences Building.
Kabayatanna, nagkiddaw met ti pangipalawag ti PLM College of Law Student Council no nasurot dagiti pagibasaran ti Legal Education Board iti panangted ti honorary degree.
