Nagpanawagan ni Senador Imee Marcos iti Social Security System, PAGIBIG ken Philhealth a mangipatungpalda iti temporaryo a panagsingir ken loan moratorium.
Dayta ket tapno saan unay a marikna ti nakaro a kinadagsen a mapaspasaran dagiti Pilipino gapu iti agtultuloy a panagpangina ti presio ti langis ken dagiti kangrunaan a magatang.
Segun ken ni Marcos, mariknan dagiti mangmangged, mannalon, mangngalap, ken babassit a negosiante ti epekto ti krisis iti enerhia, manipud iti plete agingga iti presio ti taraon, isu a dakkel a tulong no isardeng pay laeng ti panagsingir dagiti nadakamat nga ahensia.
Inyunay-unay ti senador a naaramid dagitoyen nga addang idi pandemya ken kadagiti naglabas a didigra, ken nakatulong a mangpalung-aw kadagiti apektado a sektor.
