VIGAN CITY – Inlawlawag ni Dr. Leslie Asuncion-Viado manipod Ilocos Sur Medical Society a posible a ma-brain dead ti maysa a tao nu saan a naikkan iti Cardiopulmonary Resuscitation wenno CPR iti uneg iti innem a minutos kalpasan iti pannakapukawna iti puot.
Iti pannaki-uman ti Bombo Radyo Vigan ken ni Dr. Asuncion-Viado, napateg iti panangisayangkat iti CPR tapno maisubli iti sirkulasyon iti dara manipod iti puso nga agturong iti utek, kidney, tiyan ken dadduma pay a paset iti bagi tapno ag-function.
Segun ti doktor, napateg a maaddaan iti maysa a kameng iti tunggal pagtaengan nga ammona iti ag-CPR tapno makatignayda nu man bilang adda iti maawanan ti puot, maatake iti puso, malmes ken ma-choke.
Inyunay-unayna nga ipangruna iti 5C’s nu isayangkat ti CPR nga isu iti check, call, cover, compress ken connect.
Iti panangisayangkat iti CPR, ket rumbeng a batogen ti chest area ti pasyente, naka-interlock ti dua nga ima a nakaibatog iti dakulap iti barukong, rumbeng nga straight iti siko wenno saan nga agtukkol nu isayangkaten ti CPR ta ti bagi tu rumbeng nga agkuti.
Babaen ti panag-pump ket agbilang iti maysa agingga tallopulo wenno maibilang a one-cycle ket mabalin nga aramiden iti agingga lima a cycle sakbay a kitaen nu agang-anges ti pasyente.
Kabayatanna, masapul nga agpatulong latta kadagiti umno a rescuer nga ammona iti ag-CPR tapno adda katinnulong iti panagsalbar ti pasyente.
