Kinumpirmaran ni dati a Public Works and Highways Secretary Rogelio Singson a nakaawat isuna ti informal offers manipod Malakanyang tapno agserbi a sumaruno a secretary ti DPWH iti baet ti kontrobersyal a sangsangwen iti ahensya gapu ti flood control projects.
Segun ken ni Singson, naaddaanda ti taripnong ken ni Pres. Ferdinand Marcos Jr. tapno pagpatangan ti integrated water resources management program iti administrasyon.
Kinunana a nabayagdan nga agam-ammo iti presidente manipod gobernador ken senador pay laeng.
Nupay kasta ket inlawlawag ni Singson a posible a saan a magustoan ti asawana nu agsubli iti gobierno.
Numan pay saanna nga inawat ti naidiaya a sukatanna ni DPWH Secretary Manuel Boanoan ket kinunana a nakasagana isuna a mangidaulo ti independent panel nga agimbestgar kadagiti anomalya iti flood control projects.
Ni Singson ket nagserbi a DPWH secretary manipod 2010 agingga 2016 iti salinong ti administrasyon daydi President Noynoy Aquino.
