Binabalaw ni ACT-CIS party-list Rep. Erwin Tulfo ti saan a panagatendar ti Civil Service Commission (CSC) iti pannakadengngeg ti Bill 8941, wenno gakat a ti gagemna ket mabilin dagiti opisina ti gobierno ken ti pribado a sektor a mang-hire kadagiti empleado a Person with disabilities (PWD).
Gapu iti saan a panagatender ti CSC ken awan ti naited nga explanation, pinaayaban ni Tulfo dagiti pannakabagi ken opisyal ti CSC tapno umatendar iti sumaruno a hearing.
Binabalaw pay ni Tulfo dagiti ahensia ti gobierno gapu iti saan a panagtungpal iti panangted iti posision wenno trabaho kadagiti PWD.
Inyunay-unay na a no saan nga idauluan ti gobierno ti pannakaipatungpal ti nasao a gakat, kasano a sumurot ti pribado a sektor.
Nadismaya pay ni Tulfo gapu iti panangkontra ti pribado a sektor iti nasao a singasing.
Segun iti sumagmamano nga asosasion dagiti employers, kasapulan a mangikabilda kadagiti baro nga alikamen para kadagiti ma-hire a PWD ken dumalanda pay iti panagsanay.
No agbalin a linteg ti nasao a gakat, masapul a mangilatang dagiti ahensia ti gobierno ti 1% ti para kadagiti PWD, kasta pay dagiti pribado a kompania nga addaan iti nasurok 100 nga empleado.
Maalallukoy pay dagiti pribado a kompania nga addaan iti nakurang a sangagasut nga empleado a mangiltang iti posision para kadagiti PWD nga agsapsapul iti trabaho.
