Nakapasan ti maikadua a pannakaibasa iti Kamara ti gakat a mangted ti libre a licensure ken civil service examination para kadagiti kualipikado nga indigent ken dagiti miembro ti Indigenous Peoples (IPs).
Ti House Bill No. 8869 wenno “Free Professional Examinations Act” ket induron ti House leadership iti panangidaulo da House Speaker Faustino Dy ken House Majority Leader Sandro Marcos.
Gagem ti gakat nga ikkaten ti pinansyal a parikot para kadagiti marigrigat a Pilipino a kayatna iti makaala ti lisensya wenno agtrabaho iti gobierno.
Segun ken ni Marcos, ti parikot dagiti narigat a Pilipino ket saan a ti kurang a talento wenno determinasyon no diketdi tin angina nga examination fees.
Iti salinong ti nasao a bill, saanen a pagbayaden ti examination fees dagiti kualipikado nga aplikante kadagiti exam nga idadauloan ti Professional Regulation Commission (PRC) para kadagiti board exam dagiti mangisursuro, nurse, engineer ken dadduma pay ken Civil Service Commission (CSC) para kadagiti kayatna a sumrek iti government service.
Tapno agbalin a benepisyaryo, kasapulan nga agipakita ti aplikante iti Certificate of Indigency manipod kadagiti lokal a gobierno ken Certification manipod National Commission on Indigenous Peoples (NCIP).
Mabalin laeng nga i-avail ti libre nga exam iti maminsan a daras iti uneg iti maysa a tawen iti tunggal kualipikado nga indibidual.
