Impila ni Sen. Mark Villar ti Senate Bill No. 1272 wenno ti Kabalikat sa Hanapbuhay Act a panggepna a kissayan ti gastos iti pananggun-od kadagiti kasapulan a dokumento para kadagiti nakurapay a Pilipino nga agsapsapul iti trabaho.
Kalikaguman ti nasao a gakat a maited ti 20 a porsiento a discount iti bayad para iti barangay clearance, NBI ken PNP clearance, medical certificate, sertipiko manipud iti Philippine Statistics Authority (PSA), TESDA ken Civil Service Commission, kasta met dagiti dadduma pay nga naaprobaran a dokumento iti panggedan.
Karaman pay iti gakat ti pannakaiwaksi ti bayad para iti Tax Identification Number (TIN), transcript of records, transfer credentials, authenticated diploma ken sertipiko ti nasayaat a moral a kababalin manipud kadagiti kolehio ken unibersidad ti publiko.
Dagiti aplikante nga awan ti umdas a kitada wenno makagun-od iti baba ti naikeddeng a pagrukodan ti kinapanglaw, pakairamanan dagiti kameng ti 4Ps, ket maikari iti benepisio, bayat a ti benepisio ket mabalin laeng nga usaren maminsan iti kada innem a bulan iti tunggal ahensia, malaksid kadagiti umuna a gundaway nga agsapsapul iti trabaho a sigud a sakupen ti agdama a linteg.
