Intal-o ni Bagong Henerasyon Partylist Rep. Robert Nazal a mairaman iti 2026 national budget ti pondo para iti rehabilitasyon dagiti lugar nga inapektaran iti gingined idiay Cebu.
Segun ken ni Nazal, kas kadagiti immuna a Kongreso ket masapul a siguradoen ti kamara nga adda mailatang tapno maibangon dagiti nadadael a komunidad agraman dagiti narpuog a simbaan ken dadduma pay nga istraktura.
Nagpanawagan pay ti kongresista iti Department of Human Settlements, Department of Public Works and Highways (DPWH), ken Department of the Interior and Local Government (DILG) a siguradoen ti kinatalged ti publiko babaen iti panangipatakder manen kadagiti pagtaengan ken dagiti kasapulan nga imprastraktura.
Kadagiti sumaruno a lawas wenno bulan ket dumawatda iti governance ken business continuity measures dagiti maseknan nga ahensia ti gobierno para iti panagbangon dagiti naapektaran a barangay.
Suportaranna ti ania man nga addang ti kongreso tapno matulongan dagiti biktima iti didigra.
