VIGAN CITY- Ngan-nganin maartapan ti Team Ilocos Sur ti rekord da idi napalabas a tawen ta manay-nayunan dagiti medalya a maal-ala dagiti atleta iti agtultuloy a Region 1 Athletic Association (R1AA) meet idiay Laoag City, Ilocos Norte.
Segun ken ni Joe Bueno, Deped-Ilocos Sur Division Sports Chief, napintas iti performance dagiti atleta iti R1AA meet itatta a tawen ket dakkel a tulong ti swimming program ti provincial government tapnu magun-od ti probinsiya iti kaunaan a balitok a medalya iti swimming event babaen ken ni Amber Quelendrino.
Malaksid ti swimming, dagiti atleta ti badminton pay iti nangipakita iti laing da ta addan iti tallo a balitok a medalya a naala ti team iti nasao nga ay-ayam ken nabigbig pay ti Team Ilocos Sur kas Best Delegation in Pencak Silat ta innem a balitok a medalya iti naala dagiti atleta iti nasao nga event.
Pinasingkedan met ni Bueno nga idi pay laeng intensive training ti Ilocos Sur delegation ket pangnamnamaan dan iti balitok a medalya ni Stephanie Jaduca gapu ti napintas a performance na.
Ni Jaduca ket duan a balitok a medalya iti naala na iti R1AA itatta a tawen iti benneg ti athletics.
