Nakasagana nga usaren ti House prosecution panel ti liquidation report nga impasa dagiti abogado ni Vice President Sara Duterte tapno mapadaras ti proceedings iti Senate impeachment court.
Segun ken ni House prosecution counsel at legal spokesperson Atty. Benjamin Tolosa Jr., tapno maikkat ti panagdudua ti kampo ni VP Sara iti authenticity dagiti rekord nga ipasango ti prosekusyon iti trial ket nakasagana da a ti rekord ti depensa lattan ti maaramat.
Kayat ti prosekusyon nga ipresentar ti liquidation report nga impasa ti Office of the Vice President (OVP) iti Commission on Audit (COA) para iti liquidation ti confidential funds.
Ti panagtulag ti prosekusyon ken depensa iti authenticity dagiti dokumento ket mangikkat iti pagkasapulan a doble-doble a paneknekan no husto dagiti dokumento sakbay a trataren ti maysa a testigo ti linaon-na.
Kabayatanna, impaganetget ni Tolosa a napateg ti kina-adu ti ebidensia gapu ta sakop ti Article I ti rinibo a documentary exhibits a naurnong ti agsumbangir a kampo.
