Kiniddaw dagiti prosecutor ti Office of the Ombudsman iti Sandiganbayan Third Division nga ibabawi ti decision a nangipalubos a maka-piyansa ni former Senador Ramon Bong Revilla Jr. iti sangsangoen na a kaso a malversation mainaig iti maipagarup a ghost flood control project idiay Pandi, Bulacan.
Iti naipila a motion for reconsideration, pinasingkedan ti prosekusyon a saan a naan-anay ti nagibasaran iti decision ti korte a ti maipagarup a panagawat ti “commitments” wenno kickbacks ni Revilla ket saan a pampubliko a pondo tapno maikkat iti pannakadusa na iti maipagarup a madi a panagaramat ti P76.9 milyon a pondo ti gobierno.
Impaganetget ti prosekusyon a saan a kaano man a naibaga a dagiti naawat a kickback ni Revilla ti mismo a pondo a nasayang.
Ti maipagarup a panagawat ti dati a senador ti advance kickbacks ket indikasion ti pannakikaysa na iti plano nga i-diver ti pondo ti gobierno.
Pinasingkedan met ti Ombudsman a ni Revilla ti maipagarup a timmulong tapno mairaman ti kontrobersial a proyekto iti appropriations bill ken iti 2025 General Appropriations Act.
