VIGAN CITY – Mapatta-patta nga umabot ti tallo pulo a ribo a pisos a gatad dagiti processed meat product ti nasalamaan idiay Brgy. Villa Quirino, San Esteban.
Innala ti Municipal Agricultural Office nga idaulwan ni meat inspector Julius Abad Ayson dagiti innem a pulo a sako ti chicharon, innem a pulo a pakete ti kropek, tallo pulo a bagis-bagis a kukua ni Michelle Alcantara nga agnaed diay Talavera, Nueva Ecija ken maipatulod koma ken ni Albert Lopez Rivera, agtawen ti tallo pulo ket tallo a tubo ti San Pascual, Talavera, Nueva Ecija ngem agnaed idiay Brgy. Villa Quirino, San Esteban.
Ti pannakakumpiskar dagiti produkto ket paset pay laeng iti nainget a bilin a maiparit iti pannakaiserrek dagiti maparti a baboy, frozen hog meat, pork products ken dadduma pay a produkto a maiserrek ditoy probinsia.
Iggemen ti San Esteban Police Station dagiti nasao a produkto a nakaituding a maipan idiay Provincial Animal Quarantine Office.
