Saan a sigurado no lumaka nga insigida ti presyo iti langis apaman a malpas iti rinnupak wenno maaddaan ti ceasefire idiay Middle East, uray nakaalan ti clearance para iti natalged a panagdalyasat iti Strait of Hormuz dagiti barko iti pagilian nga agkarga iti langis.
Ti nasao a banag ket pinasingkedan ni Energy Secretary Sharon Garin iti panagdenggeg ti Legislative Energy Action Development Council (LEAD) wenno House Deca Tri Committee.
Inlawlawag ni Garin nga adu iti global factors isu a saan nga insigida a mailaklaka iti presyo iti produkto petrolyo kas kadagiti nadadael nga oil infrastructure ken ngimmato a delivery costs.
Impaganetget ni Garin a dakkel a paset ti suplay iti langis ket manipod kadagiti pagilian wenno rehiyon nga apektado iti tensyon.
