Saan a pagbabawian ni President Ferdinand Marcos Jr. a nagbalin a presidente ti Pilipinas uray nadagsen dagiti akemna ken adu dagiti rumbeng nga aramidenna.
Segun ken ni Marcos, saanna nga ibilang a parikot iti sangsangwenna ita kas presidente ta trabahona dayta.
Maysa pay a rason nu apay nga awan ti pagbabawianna a nagbalin a presidente ket ti napaut a karerana iti politika isu a natalek kadagiti karit a sumangsangbay.
Kinunana a ti panagbalin a presidente iti kadakkelan a dayaw ken pribilehio nga inted dagiti Pilipino iti siasinoma a nakatugaw iti puesto.
Sakbay a nagbalin a presidente ket nagbalin a vice governor ni Marcos idiay Ilocos Norte idi 1981 agingga 1983, governor idi 1983 agingga 1986 ken 1998 agingga 2007, congressman iti maikadua a distrito iti Ilocos Norte manipod 1992 agingga 1995 ken 2007 agingga 2010, ken senador manipod July 2010 agingga 2016.
