Nakasublin iti Pilipinas ni Pres. Ferdinand Marcos Jr. idi rabii ket bitbitna ti nasurok USD21 billion a gatad ti investment pledges ken renewed strategic commitments manipod Amerika kasaruno ti high-level three-day official visit idiay Washington DC.
Segun ti Presidential Communications Office, ti eroplano a nagluganan ni Marcos ken delegasyonna ket simmangpet iti pagilian iti alas dies syete iti rabii.
Iti arrival message ni Marcos, kinuna a pinatibkerda ti nauneg nga alyansa iti Pilipinas ken Amerika maipanggep ti seguridad, ekonomia ken geopolitical cooperation.
Segun ken ni Marcos, iti pannakitaripnongna ken ni Trump, Secretary of State and National Security Adviser Marco Rubio ken Defense Secretary Pete Hegseth ket naipaganetget iti napateg nga akem ti alyansa iti panangiyetnag ti kappia ken kinatibker idiay West Philippine Sea ken Indo-Pacific nga agtultuloy a tagtagikuaen ti China.
Nakitaripnong ni Marcos kadagiti top executives iti semiconductors, healthcare ken infrastructure a gappuanan ti panangiyawidna ti pledge nga aggatad ti nasurok 21 billion US dollar nga investment a makatulong para iti pannakaaramid ti trabaho dagiti Pilipino ken makaaramid ti economic security ken resilience.
Agtalinaed a positibo ti presidente mainaig ti masangwanan a PH-US trade pakairamanan ti investment relations kangrunaan iti konteksto iti economic security and fair, balanced, ken reciprocal trade.
