Nakaawiden iti pagilian ni Pres. Ferdinand Marcos Jr. kalpasan ti working visitna idiay United Arab Emirates.
Impannakkel ti presidente iti balligi ti pannakapirma ti tulagan iti nagbaetan ti Pilipinas ken UAE nangruna ti comprehensive economic partnership agreement wenno CEPA ken ti memorandum of understanding on defense cooperation.
Segun ken ni Marcos, iti salinong ti CEPA ket nalawlawanton ti market access iti pagilian iti Middle East para kadagiti produkto iti pagilian pakairamanan ti suplay ti professional services, health, construction, information ken communications technology ken dadduma pay.
Ti panangpapigsa ti market access para iti Filipino service providers nga agturong iti UAE ket nalawag a pammigbig ti professional competence ken excellence wenno panagbalin a nalaing dagiti Pilipino iti nasao a biang ken panangbigbig iti awan sarday a kontribusyonda iti ekonomia iti UAE.
Iti met napirmaan a MOA on defense cooperation, kinuna ti presidente a mangted dalan dayta iti naun-uneg a pannakikammayet iti UAE iti advanced defense technologies kas ti unmanned aerial system, electronic warfare ken naval systems a napateg iti panangiraman iti moderno ken panangparegta ti kapabilidad ti AFP.
Iti salinong ti tulagan ket mapapigsa ti defense ken military relations iti dua a pagilian babaen ti edukasyon ken panagsanay, intelligence ken security sharing, cooperation iti anti-terrorism, maritime security ken peacekeeping operations.
