Inladawan ni Pres. Ferdinand Marcos Jr. ni boxing legend ken dati a senador Manny Pacquaio a saan laeng a pudno a kampeon iti biang ti boksing, no diketdi champion of humanity.
Dayta ket kagiddan iti napasamak a handover ceremony iti memorabilia ni Pacquiao iti National Sports Museum idiay Pasig City.
Segun ken ni Marcos, saan laeng nga iti boxing career a nalatak ni Pacquiao a nangted iti dayaw iti pagilian no diketdi kampeon pay iti tunggal Pilipino.
Malaksid iti panagpakumbaba ket tultulongan pay ni Pacquiao ti padana a boksingero nga adda parikot ti pinansyal ken salun-atna a saan nga ammo iti kaaddoan ta saannan a kayat nga ipakaammo iti publiko.
Nabigbig ni Pacquiao iti intero a lubong ta isuna laeng iti kakaisuna nga eight division world champion iti pakasaritaan iti boxing.
Karaman dagiti memorabilia nga intalek ni Pacquaio iti museum ket ti representative fight trunk-na iti nagbalin a labanda ken ni Miguel Cotto idi 2009; representative fight trunk iti labanda ken ni Antonio Margarito idi 2010 ken World Boxing Council (WBC) championship belt.
