Immatangan da Pres. Ferdinand Marcos Jr. ken Vietnamese President To Lam ti pannakapirma iti uppat a tulagan iti Pilipinas ken Vietnam idiay Malakanyang.
Karaman dayta iti Memorandum of Understanding (MOU) on Defense Cooperation a pinirmaan ti Department of National Defense (DND) ken Ministry of National Defense iti Vietnam tapno papigsaen ti panagtinnulong iti dua a pagilian iti panagbantay iti kabaybayan, panagsanay kadagiti suldado ken panagtignay kadagiti didigra.
Napirmaan pay ti MOU on Information Technology and Digital Transformation Cooperation iti nagbaetan iti Department of Information and Communications Technology (DICT) ken Ministry of Science and Technology iti Vietnam tapno mayatidog ti panagaramat ti digital services ken kabaroanan a teknolohia.
Nagtulagda pay iti salinong ti Tourism Cooperation Program a pinirmaan ti Department of Tourism (DOT) ken Ministry of Culture, Sports and Tourism iti Vietnam tapno papigsaen ti turismo ken manayonan dagiti biahe iti eroplano iti nagbaetan iti Pilipinas ken Vietnam.
Nagpirma pay iti tulagan iti University of the Philippines (UP) ken ti Academy of Public Administration and Governance iti Ho Chi Minh National Academy of Politics para iti panagsinnukat dagiti estudyante ken mangisursuro.
